اسلام آباد: وفاقی حکومت نے امریکی ڈالر کی قیمت میں اضافے اور روپے کی قدر میں مسلسل کمی کے پیشِ نظر اکتالیس کے قریب غیر ضروری اور لگژری اشیاء کی درآمد پر مکمل پابندی عائد کر دی ہے۔
ملک میں جاری معاشی بحران کو مزید سنگین ہونے سے روکنے کے لیے موجودہ حکومت نے یہ مشکل فیصلہ لیا ہے تاکہ غیر ضروری و لگژری اشیاء کی درآمد پر قیمتی زرمبادلہ خرچ کرنے سے بچا جا سکے۔
ملک کو ایک طرف زرِمبادلہ کے ذخائر کے استحکام کا مسئلہ درپیش ہے تو دوسری طرف انٹر بینک اور اوپن مارکیٹ میں ڈالر ملکی تاریخ کی بلند ترین سطح پر پہنچ کر اوپن مارکیٹ میں 200 روپے 50 پیسے میں فروخت ہو رہا ہے۔
ملک کی بگڑتی معاشی صورت حال پر قابو پانے کے لیے حکومت نے اہم اقدامات اٹھانے کا فیصلہ کیا ہے اور اس سلسلے میں حکومت کو امپورٹڈ اشیاء پر ڈیوٹی بڑھانے کی بھی تجویز پیش کی گئی ہے۔ ان اشیاء میں درآمدی ٹائر، مشینری، پاور جنریشن مشینری اور اسٹیل کی مصنوعات شامل ہیں۔
اسی طرح 1000 سی سی سے اوپر کی گاڑیوں پر 100 فیصد ریگولیٹری ڈیوٹی، درآمدی ٹائلز پر ریگولیٹری ڈیوٹی میں 40 فیصد اضافے اور موبائل فون پر ڈیوٹی دگنی کرنے کی تجویز بھی حکومت کو پیش کر دی گئی ہے۔
مزید خبروں اور اپڈیٹس کیلئے وزٹ کیجئے گرانہ بلاگ
