وفاق کا 400 ارب کے تعمیراتی منصوبے شروع کرنے کا اعلان

اسلام آباد: وفاقی وزیر برائے اطلاعات و نشریات شبلی فراز نے کہا ہے کہ وفاقی حکومت رواں مالی سال کی آخری سہ ماہی میں 400 ارب روپے کے تعمیراتی منصوبے شروع کرے گی۔
اُن کا کہنا تھا کہ وزیرِ اعظم کا ویژن یہ ہے کہ تعمیراتی شعبے کو اہمیت اور ترجیح دی جائے کیونکہ اسی شعبے سے مُلکی معیشت بہتری کی جانب گامزن ہوگی۔
انہوں نے کہا کہ گھروں کی تعمیر کا پراجیکٹ اس سال 20 اکتوبر سے شروع ہوجائےگا جس پر رواں سال 145 ارب روپے خرچ کیے جائیں گے۔
اُن کا کہنا تھا کہ حکومت نے نیا پاکستان ہاؤسنگ سکیم کے لیے فلوقت 30 ارب روپے کی سبسڈی رکھی ہے۔ اس سکیم کا مقصد یہ ہے کہ معاشرے کا متوسط اور نچلا طبقہ اپنے گھروں کی تعمیر کرسکے۔
انہوں نے یہ بھی کہا کہ اس ہفتے وزیرِ اعظم سے مختلف سرمایہ کاروں اور بلڈرز کی ملاقات ہوئی جس میں صنعت و تجارت کے فروغ سمیت اہم اُمور زیرِ غور آئے۔
اُن کا کہنا تھا کہ وزیرِ اعظم نے یہ فیصلہ کیا ہے کہ اب ہر دو سے تین دن بعد تعمیراتی صنعت کے فروغ کے حوالے سے مختلف اسٹیک ہولڈرز سے ملاقاتیں کی جائیں گی کیوں کہ یہ سیکٹر نہ صرف مُلکی معیشت کو بحال کریگا بلکہ نوجوانوں کے لیے نوکریوں کے مواقع بھی پیدا کریگا۔

مزید خبروں اور اپڈیٹس کے لیے وزٹ کیجئے گرانا بلاگ۔