سی ڈی اے کا کشمیر چوک پر رقص کرتے رنگین فواروں کی تنصیب کا فیصلہ

اسلام آباد: وفاقی ترقیاتی ادارے کیپیٹل ڈیویلپمنٹ اتھارٹی (سی ڈی اے) نے سری نگر ہائی وے پر واقع کشمیر چوک میں رقص کرتے رنگین فواروں کی تنصیب کا فیصلہ کیا ہے۔

چیئرمین سی ڈی اے عامر علی احمد کی زیرِصدارت گذشتہ روز ایک اہم اجلاس منعقد ہوا جس میں متعلقہ شعبوں کے افسران نے شرکت کی۔

اجلاس میں چیئرمین کپیٹل ڈویلپمنٹ اتھارٹی کو بریفنگ دیتے ہوئے بتایا گیا کہ اسلام آباد شہر کو مزید خوبصورت اور پُرکشش بنانے کیلئے متعدد منصوبوں پر تیزی سے کام جاری ہے۔

اسی سلسلے میں انوائرمنٹ ونگ کی جانب سے بریفنگ کے دوران چیئرمین سی ڈی اے کو بتایا گیا کہ اسلام آباد شہر کو مزید خوبصورت اور دلکش بنانے کے لئے جہاں مختلف گرین بیلٹس، سڑکوں اور نالوں کے اطراف سلوپس سمیت پارکس کو مختلف رنگ کے موسمی پھولوں سے سجایا جارہا ہے وہیں کشمیر چوک رائونڈ ابائوٹ پر ڈانسنگ فوارے نصب کرنے کا بھی فیصلہ کیا گیا ہے۔

اجلاس میں ڈانسنگ فواروں کے مختلف تھری ڈی ڈیزائن چیئرمین سی ڈی اے کے سامنے پیش کیے گئے جن میں سے ایک ڈیزائن کی منظوری چیئرمین سی ڈی اے کی جانب سے متعلقہ شعبہ جات کو جاری کی گئی۔

مزید برآں متعلقہ شعبہ جات کی جانب سے ڈانسنگ فواروں کی کُل لاگت اور تخمینے کو مرتب کرنے کے بعد ٹینڈرز اخبارات میں شائع کردئیے جائیں گے۔

اس موقع پر سی ڈی اے انتظامیہ کا کہنا تھا کہ اسلام آباد شہر کی خوبصورتی کو برقرار رکھنے کے ہرممکن اقدامات اٹھائے جائیں گے تاکہ شہریوں کو تفریحی سرگرمیوں سمیت اعلیٰ معیارِ زندگی فراہم کیا جا سکے۔

مزید خبروں اور اپڈیٹس کیلئے وزٹ کیجئے گرانہ بلاگ۔