اسلام آباد: اسٹیٹ بینک آف پاکستان کے مطابق ریئل اسٹیٹ سیکٹر کو بینکوں سے 1262 ارب روپے کے قرضے جاری کیے جا چکے ہیں۔
اسٹیٹ بینک آف پاکستان نے 31 اگست 2022 تک ریئل اسٹیٹ کے قرضوں کی تفصیلات جاری کر دیں۔
بینکاری نظام سے رئیل اسٹیٹ سیکٹر کو زمین کی خریداری اور عمارت کی تعمیر کے لئے جاری کیے گئے مجموعی قرض کا حجم 1262 ارب روپے سے تجاوز کر گیا ہے۔
مرکزی بینک کی جانب سے جاری کردہ اعداد و شمار کے مطابق زمین یا پلاٹ کی خریداری کے لئے قرض 570 ارب روپے ہو گیا ہے جبکہ نجی بینکوں نے سب سے زیادہ 353 ارب روپے کا قرض دیا۔ حکومتی بینکوں نے 103 ارب روپے کے قرضے جاری کیے۔
اگر عمارت کی تعمیر کی بات کی جائے تو مرکزی بینک اس کو تین حصوں میں تقسیم کرتا ہے یعنی گھر، کمرشل عمارتیں اور انڈسٹریل تعمیرات۔
مجموعی طور پر تعمیرات کے لئے 692 ارب روپے کے قرض جاری کیے جا چکے ہیں اور ان میں سب سے زیادہ گھروں کے لئے قرضوں کا اجراء کیا گیا جو 31 اگست تک 237 ارب روپے تک پہنچ گئے۔
کمرشل عمارتوں کے لئے جاری قرض کا حجم 225 ارب تک پہنچ گیا جبکہ انڈسٹری کے لیے تعمیراتی قرض کا حجم 165 ارب روپے ریکارڈ کیا گیا۔
ریئل اسٹیٹ کو قرض کی فراہمی میں سب سے زیادہ کردار نجی بینکوں کا رہا جنہوں نے مجموعی طور پر 905 ارب روپے کے قرض جاری کیے۔
حکومت کے زیرِانتظام بینکوں نے 233 ارب روپے کے قرض جاری کیے۔
مزید خبروں اور اپڈیٹس کیلئے وزٹ کیجئے گرانہ بلاگ۔
