اسلام آباد: وفاقی ترقیاتی ادارے کیپٹل ڈیویلپمنٹ اتھارٹی (سی ڈی اے) نے وفاقی دارالحکومت اسلام آباد کے سیکٹر جی ٹین فور میں تھَرڈ روڈ پر واقع ہل پارک کا افتتاح کر دیا۔
افتتاحی تقریب میں چیئرمین سی ڈی اے عامر علی احمد سمیت کیپٹل ڈیویلپمنٹ اتھارٹی کے ممبر فنانس اور متعلقہ شعبوں کے افسران اور تاجر برادری کے نمائندگان کی ایک بڑی تعداد نے شرکت کی۔
چیئرمین سی ڈی اے نے ہل پارک کے افتتاح کے موقع پر پودا لگا کر رواں برس سپرنگ پلانٹیشن مہم کا آغاز بھی کیا جبکہ شعبہ ماحولیات کی جانب سے پارک کے افتتاح کے موقع پر 500 سے زائد پودے بھی لگائے گئے۔
چیئرمین سی ڈی اے نے ہدایات جاری کرتے ہوئے متعلقہ شعبوں کو کہا کہ روشنی کے مناسب نظام کیلئے مزید اقدامات کئے جائیں۔ اسی طرح شہریوں کو صحت مندانہ سرگرمیاں فراہم کرنے کیلئے جوگنگ ٹریک کو بھی مزید بہتر کرنے کی ہدایات جاری کی گئیں ۔
واضح رہے کچھ عرصہ قبل یہ جگہ ناقابل استعمال اور غیر فعال ہونے کے ساتھ ساتھ یہاں کچرے کے انبار تھے۔ جس پر سی ڈی اے انتظامیہ کی خصوصی دلچسپی کے باعث یہاں پارک کی تعمیر کی گئی تاکہ شہریوں کو صحت مندانہ اور تفریحی سہولیات فراہم کی جا سکیں۔
چیئرمین سی ڈی اے نے متعلقہ شعبوں کو ہدایت جاری کرتے ہوئے مزید کہا کہ رواں برس موسم بہار میں شہر بھر میں تین لاکھ سے زائد بڑے سائز کے پودے لگائے جائیں۔
مذکورہ پارک میں بچوں کے کھیلنے کیلئے جھولے، واک ویز، جوگنگ ٹریک، سائیکلنگ ٹریک سمیت دیگر سہولیات بھی شامل ہیں۔ اسی طرح ماحول کو سرسبز و شاداب رکھنے کیلئے پارک میں مختلف رنگوں کے موسمی پھول بھی لگائے گئے ہیں تاکہ پارک میں آنے والے شہری پر فضا ماحول میں بھرپور طریقے سے لطف اندوز ہو سکیں۔
مزید خبروں اور اپڈیٹس کیلئے وزٹ کیجئے گرانہ بلاگ۔
