راولپنڈی ڈویلپمنٹ اتھارٹی (آر ڈی اے) کے ڈائریکٹر جنرل محمد سیف انور جپہ نے آر ڈی اے حکام کو ہدایت کی ہے کہ وہ قواعد کی خلاف ورزی کرنے والوں بالخصوص غیر قانونی تعمیرات میں ملوث افراد کے خلاف آپریشن شروع کر دیں۔
آر ڈی اے ترجمان کے مطابق ڈی جی آر ڈی اے نے شہر کے مختلف علاقوں بشمول ہائی کورٹ روڈ، ٹمبر مارکیٹ، پکی گلی کے علاقے اور کمرشل روڈ کا دورہ کیا اور متعلقہ حکام کو قواعد کی خلاف ورزی کرنے والوں کے خلاف آپریشن شروع کرنے کی ہدایت کی۔
حکام کا کہنا تھا کہ ڈی جی آر ڈی اے نے بلڈنگ کنٹرول ونگ کو سروے کرنے اور غیر قانونی رہائشی اور کمرشل عمارتوں کی تعمیر، کمرشلائزیشن اور دیگر خلاف ورزیوں کا جائزہ لینے کی ہدایت کی تھی۔ انہوں نے کہا کہ قواعد کی خلاف ورزی پر متعلقہ افسران اور بلڈنگ انسپکٹرز کو بھی ذمہ دار ٹھہرایا جائے گا۔
حکام کے مطابق شہریوں کی شکایات پر ڈی جی آر ڈی اے محمد سیف انور جپہ نے نالہ لئی ایکسپریس وے کا بھی دورہ کیا اور نالہ لئی کے اطراف ہونے والی تعمیرات کا جائزہ لیا۔ انہوں نے نالہ لئی کے اطراف ہونے والی غیرقانونی تعمیرات کے حوالے سے علاقے کے بلڈنگ انسپکٹر کو شوکاز نوٹس جاری کر دیا۔
ترجمان آر ڈی اے کا کہنا ہے کہ ڈی جی سیف انور جپہ کی جانب سے شہریوں کو پیغام دیا گیا ہے کہ شہری اپنی محنت کی کمائی سے غیرقانونی رہائشی منصوبوں میں سرمایہ کاری نہ کریں۔ ڈی جی آر ڈی اے نے غیر قانونی ہاؤسنگ پراجیکٹس کے مالکان کو خبردار کیا کہ وہ اپنے غیر منظور شدہ اور غیر قانونی رہائشی منصوبوں کی تشہیر بند کریں اور قانون کے مطابق اپنے پراجیکٹس کے این او سی کے حصول کے لیے آر ڈی اے سے رابطہ کریں۔ بصورت دیگر قانونی کاروائی عمل میں لائی جائے گی۔
مزید خبروں اور اپڈیٹس کیلئے وزٹ کیجئے گرانہ بلاگ۔
