لاہور ڈویلپمنٹ اتھارٹی (ایل ڈی اے) کے دفتر میں بروز جمعہ کھلی کچہری کا اہتمام کیا گیا جس میں پنجاب کے سینئر وزیر میاں اسلم اقبال نے ایل ڈی اے کے ون ونڈو سہولت مرکز میں عوامی شکایات سنیں۔ سینئر وزیر نے کھلی کچہری کے دوران کچھ شہریوں کو موقع پر ریلیف بھی دیا۔
ایل ڈی اے حکام کے مطابق شکایت کنندگان سے گفتگو کرتے ہوئے ان کا کہنا تھا کہ ون ونڈو سہولت مرکز کی اَپ گریڈیشن کا کام ایک ماہ میں مکمل کر لیا جائے گا اور اس سے شکایات کے ازالے کے عمل میں تیزی آئے گی۔
انہوں نے مزید کہا کہ عوام کے جائز مسائل کو ترجیحی بنیادوں پر حل کیا جائے گا۔
حکام کے مطابق میاں اسلم اقبال کا کہنا تھا کہ شکایات کے ازالے میں غفلت برتنے والے افسران کے خلاف کارروائی کی جائے گی۔ انہوں نے مزید کہا کہ عوامی خدمت کرنے والے افسران ہمارے لیے قابلِ احترام ہیں لیکن اپنی ڈیوٹی پر توجہ نہ دینے والے افسران کی ادارے میں کوئی جگہ نہیں۔
وفاقی وزیر نے کہا کہ مستقل بنیادوں پر بونافائیڈ کمیشن بنایا جا رہا ہے جس سے ایل ڈی اے کے معاملات میں بہتری آئے گی۔
انہوں نے کہا کہ ایل ڈی اے پر عوام کا اعتماد بحال کیا جائے گا اور ادارے کو حقیقی معنوں میں عوامی خدمت کا ادارہ بنایا جائے گا۔
علاوہ ازیں بعد ازاں بروز اتوار پنجاب کے سینئر وزیر میاں اسلم اقبال نے اعلان کیا کہ طاقتور لینڈ مافیا کو روکنے کے لیے صوبے بھر میں غیر قانونی رہائشی منصوبوں کے خلاف سخت کارروائی کی جائے گی۔
میڈیا سے گفتگو کرتے ہوئے ان کا کہنا تھا کہ معاشرے کا غریب طبقہ ان غیر قانونی نجی رہائشی منصوبوں میں پلاٹ خریدنے کے لیے اپنا سب کچھ بیچ دیتا ہے لیکن بعد ازاں انہیں معلوم ہوتا ہے کہ ان کے ساتھ دھوکا ہو گیا، یوں ان کی زندگی بھر کی جمع پونجی ضائع ہو جاتی ہے۔
ان کا کہنا تھا کہ پنجاب حکومت کی جانب سے فیصلہ کیا گیا ہے کہ صوبہ بھر میں غیر قانونی ہاؤسنگ سوسائٹیوں کے خلاف سخت کارروائی عمل میں لائی جائے گی۔
مزید خبروں اور اپڈیٹس کیلئے وزٹ کیجئے گرانہ بلاگ۔
