سیونتھ ایونیو انٹرچینج انڈرپاس جلد ٹریفک کے لیے کھول دیا جائے گا: سی ڈی اے

وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) کا کہنا ہے کہ سیونتھ ایونیو انٹرچینج پر موجود انڈرپاس جلد ٹریفک کے لیے کھول دیا جائے گا۔ اس سے قبل سیونتھ ایونیو پر ٹریفک کی آمد و رفت جاری ہے۔

سی ڈی اے چیئرمین کیپٹن (ر) محمد عثمان یونس کا کہنا ہے کہ سی ڈی اے ٹیم کی انتھک محنت کے باعث انٹرچینج کی تعمیر مکمل کی جا چکی ہے اور اسے ٹریفک کے لیے کھول دیا گیا ہے۔ آئندہ چند دنوں میں انڈرپاس بھی ٹریفک کے لیے کھول دیا جائے گا۔

انہوں نے کہا کہ اب ہم دیگر تمام جاری ترقیاتی منصوبوں کو مقررہ مدت میں مکمل کرنے پر توجہ مرکوز کر رہے ہیں۔ یہ سی ڈی اے کے چند منصوبوں میں شامل تھا جو وقت پر مکمل ہو گئے ہیں۔

گزشتہ سال جولائی میں 1 ارب 70 کروڑ روپے لاگت پر مشتمل مذکورہ منصوبے کا سنگِ بنیاد رکھا گیا تھا۔ یہ انٹرچینج سیونتھ ایونیو، سری نگر ہائی وے، خیابانِ سہروردی اور آبپارہ کے قریب گارڈن ایونیو کے سنگم پر بنایا گیا ہے۔

سی ڈی اے ذرائع کے مطابق آئندہ ہفتے مذکورہ منصوبے کا افتتاح ممکن ہے۔ منصوبے کا ٹھیکہ نیشنل لاجسٹک سیل (این ایل سی) کو دیا گیا تھا۔

علاوہ ازیں سی ڈی اے چیئرمین نے سری نگر ہائی وے پر ایلیویٹڈ یوٹرن کے ڈیزائن مکمل کرنے کی ہدایت کر دی۔ حکام کے مطابق گزشتہ سال سی ڈی اے نے سرینگر ہائی وے پر پشاور موڑ سے ترنول تک متعدد یو ٹرن بنائے تھے تاکہ ٹریفک کی روانی ہموار ہو سکے۔ تاہم، ٹریفک سگنل ہٹانے کے بعد، مصروف ترین شاہراہ کو حادثات سے بچانے کے لیے سی ڈی اے چیئرمین نے ہائی وے پر ایلیویٹڈ یو ٹرن کے ڈیزائن کو مکمل کرنے کی ہدایت کر دی۔

مزید خبروں اور اپڈیٹس کے لئے وزٹ کیجئے گرانہ بلاگ۔

About Rizwan Ali Shah

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے