پنجاب ڈویلپمنٹ ورکنگ پارٹی (پی ڈی ڈبلیو پی) نے پنجاب میں 36 ارب 52 کروڑ روپے لاگت پر مشتمل دس ترقیاتی منصوبوں کی منظوری دے دی۔
حکام کے مطابق پنجاب میں شاہراہوں کی تعمیر اور صنعتی سیکٹر کے لیے مذکورہ لاگت پر مشتمل ترقیاتی منصوبوں کی منظوری دی گئی۔
حکام نے بتایا کہ چیئرمین پلاننگ اینڈ ڈویلپمنٹ بورڈ عبداللہ خان سنبل نے پنجاب ڈویلپمنٹ ورکنگ پارٹی کے 22ویں اجلاس کی صدارت کی۔ اجلاس میں جن منصوبوں کی منظوری دی گئی ان میں گجرات میں ایک نئی چھوٹی صنعتی اسٹیٹ اور قابل تجدید توانائی کے مراکز کا قیام جیسے کہ گورنمنٹ اپرنٹس شپ ٹریننگ سینٹر، ٹاؤن شپ لاہور اور گورنمنٹ کالج آف ٹیکنالوجی، ٹیکسلا شامل ہیں۔
حکام کا کہنا تھا کہ پنجاب میں افرادی قوت کو بہتر بنانے کے منصوبے پر 23 ارب 98 کروڑ روپے سے زائد لاگت آئے گی جبکہ قابلِ تجدید توانائی کے شعبے میں مراکز کے قیام پر تقریباً 90 کروڑ 50 لاکھ روپے لاگت آئے گی۔
علاوہ ازیں حکام نے بتایا کہ منظور شدہ ترقیاتی منصوبوں میں ضلع میانوالی میں چشمہ جھیل سے اَلو والی پپلاں کلور کوٹ روڈ تک 8 کلومیٹر طویل ڈی آئی خان سڑک کی تعمیر اور ضلع رحیم یار خان کی تحصیل صادق آباد کی تعمیرِنو کے منصوبے میں سنجار پور تا ٹِلو روڈ (والہار موڑ) براستہ ولہار بندور تک سڑک کی توسیع اور بحالی کے کام کی نظرِ ثانی شامل ہیں۔
مزید خبروں اور اپڈیٹس کیلئے وزٹ کیجئے گرانہ بلاگ۔
