اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) کے چیئرمین نورالامین مینگل کی ہدایات پر افسران و ملازمین کی چھٹیاں منسوخ کر دی گئیں۔ چھٹیاں مون سون میں بارشوں کے باعث کسی بھی ہنگامی صورتحال سے نمٹنے کے لیے منسوخ کی گئیں۔
تفصیلات کے مطابق سی ڈی اے کے تمام افسران اور اہلکاروں کو ہفتے میں 7 روز کام کرنے کی ہدایت جاری کردی گئیں ہیں۔ مون سون کے دوران کسی بھی ہنگامی صورتحال سے نمٹنے کے لیے سی ڈی اے افسران اور اہلکار ہفتہ اور اتوار کے روز بھی کام کریں گے۔ لہٰذا اس ضمن میں سی ڈی اے ایڈمنسٹریشن ڈائریکٹوریٹ نے افسران اور اہلکاروں کی چھٹیاں منسوخ کرنے کا نوٹیفکیشن جاری کردیا ہے۔ واضح رہے غفلت اور لاپرواہی کا مظاہرہ کرنے والے افسران اور اہلکاروں کے خلاف سخت محکمانہ کارروائی بھی کی جائے گی۔
مزید برآں چیئرمین سی ڈی اے نے ہدایت کی ہے کہ افسران و ملازمین جدید مشینری کے ساتھ فیلڈ مین موجود رہیں۔ اور ندی نالوں کی نگرانی کے لئے سی ڈی اے کے عملے اور مشینری کی فیلڈ میں چوبیس گھنٹے موجودگی کو یقینی بنایا جائے۔
علاوہ ازیں ہنگامی صورتحال کے پیش نظر اسلام آباد میں تمام ایمرجنسی رسپانس سینٹرز بھی مکمل طور پر فعال ہیں۔ نالوں میں پانی کے بہاؤ میں کسی بھی قسم کی کوئی رکاوٹ نہیں ہے۔ جبکہ سیکٹوریل اور نان سیکٹوریل ایریاز میں سی ڈی اے، ایم سی آئی اور ضلعی انتظامیہ کی خصوصی ٹیمیں تعینات کردی گئیں ہیں۔
اسی طرح نشیبی علاقوں میں متعلقہ عملے کی ڈیوٹیاں مزید سخت کردی گئیں ہیں۔ اور کسی بھی ہنگامی صورتحال کے پیش نظر شہری سی ڈی اے کی ہیلپ لائن نمبر پر بھی رابطہ کرسکتے ہیں. مزید یہ کہ مون سون سے قبل ہی سینی ٹیشن ونگ نے شہر کے تمام نالوں کی صفائی کا عمل مکمل کرلیا تھا جبکہ نشیبی علاقوں کی سخت نگرانی کو یقینی بنایا جارہا ہے۔
مزید خبروں اور اپڈیٹس کیلئے وزٹ کیجئے گرانہ بلاگ۔
