اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) کا دارالحکومت کے مختلف سیکٹرز میں انسداد تجاوزات آپریشن جاری ہے۔
تفصیلات کےمطابق اس مہم کے تحت شہر بھر میں بلا تفریق انسداد تجاوزات کارروائیاں جاری ہیں۔ اس ضمن میں انفورسمنٹ ڈائریکٹوریٹ نے دیگر شعبوں کی معاونت سے گزشتہ دنوں میں نسٹ یونیورسٹی سیکٹر I-12/2 اور 1-12/3 کے قریب قائم غیر قانونی تجاوزات کے خلاف میگا آپریشن کیا۔ اور 300 کنال اراضی واگزار کرائی گئی تاکہ ترقیاتی کاموں میں تیزی لائی جا سکے۔
علاوہ ازیں راول ٹاؤن میں عوامی شکایات کے تحت تجاوزات کے خلاف بھی بھرپور کارروائیاں عمل میں لاتے ہوئے متعدد تھڑے اور کاؤنٹرز ختم کرکے 4 ٹرک سامان ضبط کیا گیا۔ اسی طرح پارکنگ ایریا اور گلیوں میں قائم تجاوزات کے خلاف بھی بھر پور کارروائیاں عمل میں لاتے ہوئے متعدد فروٹ سٹال سمیت دیگر تجاوزات کو ختم کردیا گیا۔
مزید یہ کہ سیکٹر F-7 مرکز میں قبضہ مافیا نے کار پارکنگ میں رہڑیوں سمیت مختلف کاونٹرز کے ساتھ تجاوزات بنا رکھی تھیں، جس کے باعث پارکنگ کے مسائل جنم لے رہے تھے۔ انسداد تجاوزات عملے نے بھر پور کاروائیاں کرتے ہوئے تجاوزات کو ختم کرکے 4 ٹرک سامان بحق سرکار ضبط کر لیا۔ اور عوامی گزرگاہ اور پارکنگ ایریاز کو کلئیر کر دیا۔
بعد ازاں بلڈنگ بائی لاز کی خلاف ورزی پر جی ٹی روڈ زون ٹو میں درجنوں عمارتوں کو سربمہر کرتے ہوئے مالکان کو نوٹسز بھی جاری کردئیے گئے۔
مزید خبروں اور اپڈیٹس کیلئے وزٹ کیجئے گرانہ بلاگ
