اسلام آباد: وفاقی ترقیاتی ادارے کیپیٹل ڈویلپمنٹ اتھارٹی (سی ڈی اے) نے ایف نائن پارک میں فیسٹیول اسکوائر تیار کرنے کا منصوبہ بنایا ہے، جہاں تجربہ کار برانڈز کو ترجیح دی جائے گی۔ ان میں فوڈ ٹرک، اسٹریٹ پرفارمرز، لوک موسیقار اور دستکاری کے اسٹالز شامل ہوں گے۔
تفصیلات کے مطابق دلچسپی رکھنے والے فوڈ برانڈز اور فرمز سے یکم نومبر تک فیسٹیول اسکوائر کا حصہ بننے کے لیے درخواستیں جمع کرانے کی ہدایات کی گئی ہیں۔ کم از کم پانچ سال کا تجربہ رکھنے والے اور بہترین ساکھ پر مبنی فرمز اور برانڈز کو ترجیحی بنیادوں پر رکھا جائے گا۔ فوڈ ٹرک، اسٹریٹ پرفارمرز، لوک موسیقار اور دستکاری کے اسٹالز دارالحکومت کے رہائشیوں کے لیے انٹرٹینمنٹ اور فوائد کا باعث ہوں گے۔
مزید یہ کہ سی ڈی اے نے فیسٹیول اسکوائر میں سٹال لگانے کے لیے ایک کوٹہ مختص کیا تھا، جس میں مردوں کے لیے 40 فیصد، خواتین کے لیے 55 فیصد اور خواجہ سراؤں کے لیے پانچ فیصد کوٹہ رکھا گیا تھا۔
علاوہ ازیں سی ڈی اے کے مطابق تفریحی مواقع فراہم کر کے F-9 پارک میں جدید ترین سہولیات تیار کرنے کا ارادہ ہے۔ اور تمام دستیاب وسائل کو بروئے کار لاتے ہوئے 750 ایکڑ رقبے پر پھیلے حصے کو ایک ماڈل پارک بنایا جائے گا۔
اہم اقدامات کی جانب بڑھتے ہوئے سی ڈی اے نے داخلی مرکزی دروازوں کے علاوہ پارک کے اندر مزید سیکیورٹی گارڈز تعنیات کرنے کی بھی ہدایات کی ہیں۔ تاکہ شہریوں کو محفوظ ماحول فراہم کیا جا سکے۔
مزید خبروں اور اپڈیٹس کیلئے وزٹ کیجئے گرانہ بلاگ
