اسلام آباد: وفاقی ترقیاتی ادارے کیپٹل ڈویلپمنٹ اتھارٹی (سی ڈی اے) نے رات کے اوقات میں شہر کو روشن رکھنے کے لئے اسٹریٹ لائٹس کی مرمت اور بحالی پر 8 کروڑ روپے سے زائد کے فنڈز خرچ کرنے کا فیصلہ کیا ہے۔
سی ڈی اے ترجمان نے اپنے ایک بیان میں کہا ہے کہ اتھارٹی کا اسٹریٹ لائٹ ڈیپارٹمنٹ اسلام آباد کی مختلف مرکزی شاہراہوں، چوراہوں، لنک روڈز، بازاروں اور گلیوں میں نئی سٹریٹ لائٹس کی تنصیب یقینی بنائے گا جبکہ خراب اور غیر موثر اسٹریٹ لائٹس اور ٹرانسفارمرز کی مرمت کا کام بھی جلد مکمل کر لیا جائے گا۔
تفصیلات کے مطابق مختلف اہم شاہراہوں اور جی ٹی روڈ کو حج کمپلیکس اور سیکٹر آئی چودہ سے ملانے والی سڑکوں پر نئی اسٹریٹ لائٹس کی تنصیب کے لیے 2 کروڑ روپے سے زائد کا بجٹ تیار کیا گیا ہے۔ اسی طرح سیکٹر آئی بارہ کی مرکزی شاہراہوں، لنک روڈز اور مارکیٹوں میں نئی اور جدید اسٹریٹ لائٹس کی تنصیب اور خراب لائٹس کی بحالی و مرمت کے لیے 1 کروڑ 90 لاکھ روپے سے زائد کا بجٹ مختص کیا گیا ہے۔
اسی طرح سیکٹر آئی سولہ کے لیے 1 کروڑ 60 لاکھ روپے مختص کیے گئے تاکہ مین ہائی ویز، سروس روڈز اور مارکیٹوں پر روشنی کے مناسب انتظام کو یقینی بنایا جا سکے۔
مزید برآں سیکٹر آئی ٹین فقیر ایپی روڈ سے وکٹری پائپ انڈسٹریل ایریا تک روشنی کے انتظامات کے لیے 1 کروڑ 10 لاکھ روپے استعمال کیے جائیں گے۔
اتھارٹی نے سیکٹر آئی چودہ میں روشنی کے مناسب انتظام کو یقینی بنانے کے لیے نئی اور جدید اسٹریٹ لائٹس لگانے کا فیصلہ کیا ہے جس کے لیے 1 کروڑ 10 لاکھ روپے رکھے گئے ہیں جبکہ سیکٹر ایچ گیارہ میں نسٹ یونیورسٹی کے گیٹ نمبر 1 سے سری نگر ہائی وے تک نئی اسٹریٹ لائٹس کی تنصیب کے لیے 70 لاکھ روپے مختص کیے گئے ہیں۔
مزید خبروں اور اپڈیٹس کیلئے وزٹ کیجئے گرانہ بلاگ
