لاہور: کمشنر لاہور محمد علی رندھاوا نے شہر میں جاری ترقیاتی منصوبوں کی نگرانی کے لیے کلوز سرکٹ ٹیلی ویژن (سی سی ٹی وی) کیمرے لگانے کے احکامات جاری کر دیئے۔
تفصیلات کے مطابق اس اقدام کا مقصد عوامی فنڈز کے غلط استعمال کو کم کرتے ہوئے ترقیاتی منصوبوں کے معیار اور رفتار کو یقینی بنانا ہے۔ مزید برآں، ان منصوبوں کی نگرانی کے لیے کمیونٹی کی شرکت اور فیڈ بیک کا استعمال کیا جائے گا۔
کمشنر لاہور نے سمن آباد گلشن راوی انڈر پاس، لاہور پل اور سی بی ڈی انڈر پاس ورک سائٹ کے دورے کے دوران ترقیاتی منصوبوں کی نگرانی کے لیے آئی ٹی پر مبنی ٹیکنالوجی کے نفاذ کا فیصلہ کیا۔ انہوں نے متعلقہ ٹیموں کو کنسلٹنٹس سے پراجیکٹ کے مقامات پر کیمرے نصب کرنے کی ہدایات کیں۔ تاکہ موثر مانیٹرنگ کو ممکن بنایا جا سکے۔
علاوہ ازیں کمشنر نے افسران کو شاہدرہ میں ملٹی لیول فلائی اوور پر کام شروع کرنے سے قبل ٹریفک کے مسائل حل کرنے کی بھی ہدایات کیں۔
ایل ڈی اے نے لاہور میں کئی ترقیاتی منصوبے شروع کر رکھے ہیں۔ تاہم انہیں مختلف وجوہات کی بنا پر تاخیر کا سامنا ہے۔ کوالٹی ایشورنس کو یقینی بنانے کے لیے حکومت نے ایل ڈی اے کو تمام منصوبوں کے لیے سخت پروٹوکول نافذ کرنے کی ہدایت کی ہے۔
مزید خبروں اور اپڈیٹس کیلئے وزٹ کیجئے گرانہ بلاگ۔
