اسلام آباد: پاکستان میں مون سون کی غیرمعمولی بارشوں اور تباہ کن سیلاب کے پیشِ نظر ملک کو ریکارڈ نقصان کا سامنا ہے۔ اس تباہی اور نقصان کے باعث اب تک 1136 افراد جان سے ہاتھ دھو بیٹھے ہیں۔
نیشنل ڈیزاسٹر مینیجمنٹ اتھارٹی (این ڈی ایم اے) کے مطابق اس قدرتی آفت سے خیبر پختونخوا، جنوبی پنجاب اور بالائی سندھ کی تین کروڑ 30 لاکھ سے زائد آبادی متاثر ہوئی۔
نقصانات کی بات کی جائے تو وفاقی وزیر خزانہ کے مطابق ان علاقوں میں اب تک دس ارب ڈالر سے زائد کا نقصان ہو چکا ہے۔
این ڈی ایم اے کے مطابق اب تک ملک کے 110 اضلاع کے ساڑھے 10 لاکھ سے زائد مکانات اور عمارتوں کو نقصان پہنچا ہے۔ متاثرین کے سات لاکھ سے زائد مویشی بہہ گئے ہیں، جبکہ کھڑی فصلوں کو نقصان پہنچا اور سبزیوں کی قیمتیں میں اضافہ اور عدم دستیابی جیسے مسائل کا سامنا ہے۔ جس سے نمٹنے کے لئے حکومت سبزیوں کی فوری درآمد کے بارے میں سوچ رہی ہے۔
سندھ سیلاب سے سب سے زیادہ متاثر ہونے والا صوبہ ہے ۔ جہاں 23 اضلاع آفت زدہ قرار دیے گئے ہیں۔ جبکہ ایک کروڑ 45 لاکھ سے زیادہ آبادی متاثرین میں شامل ہے۔
صوبہ بلوچستان کے 34 اضلاع میں 91 لاکھ 82 ہزار سے زائد افراد سیلاب سے متاثر ہوئے۔
پنجاب میں حالیہ بارشوں اور سیلاب سے صوبے کے 8 اضلاع اور وہاں کی 50 لاکھ سے زائد آبادی متاثر ہوئی۔
خیبر پختونخوا میں بھی سیلاب کی تباہ کاریوں نے متعدد اضلاع کو متاثر کیا۔ 33 اضلاع میں سیلاب سے 43 لاکھ سے زائد لوگ متاثر ہوئے۔
مزید خبروں اور اپڈیٹس کیلئے وزٹ کیجئے گرانہ بلاگ۔
