اسلام آباد: وزیرِ اعظم عمران خان نے جمعرات کے روز خیبر پختونخوا اور سندھ کے چیف سیکرٹریز اور کیپیٹل ڈیویلپمنٹ اتھارٹی (سی ڈی اے) کے چیئرمین سے شہری ترقیاتی منصوبوں کے بارے میں تفصیلی بریفنگ لی۔
وزیر اعظم آفس سے جاری شدہ سرکاری اعلامیے کے مطابق وزیرِ اعظم نے اس خیال کا اظہار کیا کہ صوبائی حکومتیں تعمیراتی صنعت کے لئے وفاقی حکومت کے اعلان کردہ مراعات کا مکمل فائدہ اٹھائے گی۔
ہاؤسنگ، تعمیرات اور ترقی سے متعلق قومی رابطہ کمیٹی کے اجلاس کے دوران وزیر اعظم عمران خان نے عہدیداروں کو تعمیرات کے دوران ماحولیاتی تحفظ اور صفائی کا خیال رکھنے کی ہدایت کی۔
وزیرِ اعظم عمران خان کا کہنا تھا کہ تعمیراتی شعبے میں سرگرمیاں تیز ہورہی ہیں جن سے معیشت میں استحکام آرہا ہے اور روزگار کے مواقع پیدا ہو رہے ہیں۔
چیف سکریٹری خیبر پختونخوا نے اجلاس کو صوبے کے چند بڑے شہروں کے ماسٹر پلانز کے حوالے سے آگاہ کیا۔
اُن کا کہنا تھا کہ قبائلی اضلاع کے ماسٹر پلانز کی تیاری پر بھی کام جاری ہے۔
سی ڈی اے چیئرمین نے اسلام آباد کے ای گیارہ سیکٹر میں جاری تعمیراتی منصوبوں کے بارے میں تفصیلی بریفنگ دی۔
مزید خبروں اور اپڈیٹس کے لئے وزٹ کیجئے گرانہ بلاگ۔
