راولپنڈی: چیرمین راولپنڈی ڈیویلپمنٹ اتھارٹی نے جڑواں شہروں یعنی راولپنڈی اور اسلام آباد کی تاجر برادری سے راولپنڈی رنگ روڈ کے ہمراہ اقتصادی زون کے قیام کے لیے تجاویز طلب کر لی ہیں۔
یہ فیصلہ پیر کو راولپنڈی رنگ روڈ اقتصادی زون کی سہولت کاری کمیٹی کے اجلاس کے دوران ہوا۔
آر ڈی اے کے چیئرمین طارق مرتضیٰ کی زیر صدارت راولپنڈی ڈویلپمنٹ اتھارٹی کے دفتر میں یہ اجلاس ہوا۔
اسلام آباد چیمبر آف کامرس اینڈ انڈسٹری (آئی سی سی آئی) اور راولپنڈی چیمبر آف کامرس اینڈ انڈسٹری (آر سی سی آئی) کے صدور نے بھی اجلاس میں شرکت کی۔
طارق مرتضیٰ نے کہا کہ رنگ روڈ منصوبے کا مقصد جڑواں شہروں کو صاف اور ستھرا بنانا ہے اور محفوظ ماحول فراہم کرنا ہے۔ اُن کا کہنا تھا کہ اس سے اسلام آباد اور راولپنڈی میں بھی ٹریفک کی بھیڑ میں کمی آئے گی۔
اُن کا کہنا تھا کہ خطے کی معیشت کو فروغ دینے کے لیے رنگ روڈ کے دونوں اطراف لاجسٹیکل اینڈ ایجوکیشن مراکز، صحت کی سہولیات، کاروباری مراکز، صنعتی زون، ٹرانسپورٹ ٹرمینلز، ہول سیل بازار، تفریحی پارکس اور رہائشی املاک تعمیر کیے جائیں گے۔
انہوں نے کہا کہ روزگار کے بے شمار مواقع پیدا ہوں گے اور لوگوں کو بہتر سہولیات فراہم کی جائیں گی۔
چیرمین آر ڈی اے کا کہنا تھا کہ اس مقصد کو حاصل کرنے کے لئے منصوبے کو پبلک پرائیویٹ پارٹنرشپ (پی پی پی) ماڈل پر دو سال میں تعمیر کیا جائے گا۔ انہوں نے زور دے کر کہا کہ بزنس کمیونٹی کو اس منصوبے میں سرمایہ کاری کرنی چاہئے اور اس موقع سے فائدہ اٹھانا چاہئے۔
اُنہوں نے یقین دلایا کہ اقتصادی زون میں سرمایہ کاروں اور کاروباری برادری کو سہولیات فراہم کی جائیں گی۔
مزید خبروں اور اپڈیٹس کے لئے وزٹ کیجئے گرانہ بلاگ۔
