اٹک: پنجاب حکومت نے ضلع اٹک کے لیے 11.74 ارب روپے کی لاگت سے دو سالہ ترقیاتی منصوبے پر مشاورت شروع کر دی ہے۔
حکومتی ذمہ داران کے مطابق دو سالہ منصوبے کے تحت نہ صرف اٹک کے مکینوں کا معیار زندگی بہتر بنانے بلکہ وہاں ضلع میں بنیادی سہولیاتِ زندگی کی فراہمی یقینی بنانے میں بھی مدد ملے گی۔
اٹک شہر میں میڈیا سے گفتگو کرتے ہوئے صوبائی وزیر برائے سماجی بہبود و بیت المال سید یاور حسین بخاری نے بتایا کہ پنجاب حکومت ضلع اٹک کے لیے دو سالہ ترقیاتی منصوبے کے اجراء کے لیے مشاورتی عمل جاری رکھے ہوئے ہے۔
انہوں نے کہا کہ مذکورہ منصوبے کی ابتدائی لاگت کا تخمینہ 11.74 ارب روپے لگایا گیا ہے جس کے تحت ضلع اٹک میں رواں مالی سال کے دوران 1174 مختلف ترقیاتی اسکیموں پر کام کا آغاز کیا جائے گا۔
انہوں نے بتایا کہ آئندہ مالی سال کے دوران 50 لاکھ روپے کی لاگت سے 75 کنال آراضی پر مشتمل امراضِ اطفال اور امراضِ نسواں سے متعلق صحت کی سہولیات یقینی بنانے کے لیے ہسپتال کی تعمیر کا کام مکمل کر لیا جائے گا۔
انہوں نے مزید کہا کہ ڈسٹرکٹ ہیڈ کوارٹرز ہسپتال اٹک میں 150 مزید بستروں کی گنجائش کا اضافہ کیا جا رہا ہے تاکہ وہاں کے مکینوں کو صحت کی بہترین سہولیات فراہم کی جا سکیں۔
مزید خبروں اور اپڈیٹس کیلئے وزٹ کیجئے گرانہ بلاگ۔
