لاہور: پنجاب حکومت نے لاہور شہر میں سنٹر پوائنٹ گلبرگ سے ڈی ایچ اے تک سگنل فری کوریڈور منصوبے کے لیے رواں مالی سال کے بجٹ میں 3 ارب 60 کروڑ روپے کے فنڈ شامل کرنے کی منظوری دے دی۔
مذکورہ منصوبے پر فنڈز کے اجراء کے لیے وزیر اعلی پنجاب نے محکمہ خزانہ کی اسٹینڈنگ کیبنٹ کمیٹی کو ہدایات جاری کی تھیں کہ اس منصوبے کو سالانہ ترقیاتی پروگرام میں شامل کیا جائے جس پر اسٹینڈنگ کیبنٹ کمیٹی برائے خزانہ نے منصوبے کے لیے 3.60 ارب روپے کا بجٹ رواں مالی سال کے سلانہ ترقیاتی پروگرام میں شامل کرنے کی منظوری دے دی۔
کوریڈور پر ٹریفک کو گلبرگ سے ڈیفنس تک سگنل فری بنایا جائے گا۔ ابتدائی پلاننگ میں پورے کوریڈور پر ٹریفک کو گلبرگ سے ڈیفنس تک سگنل فری موومنٹ فراہم کی جائے گی جبکہ خالد بٹ چوک پر چار لین ڈیول کیرج وے دو طرفہ انڈر پاس بھی تعمیر کیا جائے گا۔
منصوبے کے مطابق گھوڑا چوک پر کیولری گراؤنڈ سے ڈیفنس موڑ کی جانب تین رویہ سنگل سائیڈ فلائی اوور بنایا جائے گا۔ دوسری جانب سنٹر پوائنٹ پر 80 کروڑ روپے کے اخراجات سے نئے یوٹرن بھی تعمیر کیے جائیں گے جبکہ ڈیفنس موڑ اور والٹن روڈ کی ری ماڈلنگ بھی اس منصوبے میں شامل ہے ۔
مزید خبروں اور اپڈیٹس کیلئے وزٹ کیجئے گرانہ بلاگ
