صوبائی وزیر صنعت و تجارت میاں اسلم اقبال کے زیرِ صدارت پنجاب بورڈ برائے سرمایہ کاری و تجارت کے زیر اہتمام سیاحت کے فروغ کیلئے پبلک پرائیویٹ مکالمہ کا انعقاد کیا گیا جس میں پنجاب میں سیرو سیاحت کے فروغ اور مستحکم معیشت پر زور دیا گیا۔ اجلاس میں محکمہ سیاحت کے نمائندگان، سرکاری حکام اور سیاحت کے کاروبار سے متعلق سٹیک ہولڈرز نے شرکت کی جس کے تحت پنجاب میں سیر و سیاحت کے فروغ کے لیے حکومتی و نجی گروپ تشکیل دیا گیا۔
صوبائی وزیر اسلم اقبال کا کہنا تھا کہ معیشت کے استحکام کے لیے سیاحتی سرگرمیوں کا فروغ نا گزیر ہے۔ پنجاب میں سیرو سیاحت کے فروغ کا پوٹینشل موجود ہے۔ لہٰذا کیلنڈر آف ایونٹس بنا کر سٹیک ہولڈرز سے شیئر کیا جائے۔ ڈویژنل ہیڈ کوارٹرز پر سیاحتی سرگرمیوں کے فروغ پر فوکس کرنے کی ضرورت ہے اور لاہور کے حوالے سے ایک جامع سیاحتی پیکیج بنایا جائے۔
صوبائی وزیر صنعت و تجارت کا مزید کہنا تھا کہ محکمہ سیاحت، سیاحتی سرگرمیوں کے فروغ کے لئے موثر اقدامات کرے، حکومت ہر ممکن تعاون کرے گی۔
اجلاس مییں چئیرمین سرمایہ کاری بورڈ فضیل آصف نے بھی شرکت کی۔ ان کا کہنا تھا کہ پنجاب مذہبی سیروسیاحت کا مرکز بن سکتا ہے لیکن اس کیلئے ٹارگٹڈ حکمت عملی تشکیل دینے کی ضرورت ہے۔
اجلاس میں سیاحتی سرگرمیوں کے فروغ کے لئے جوائنٹ ورکنگ گروپ تشکیل دیا گیا۔ جس میں ٹورآپیٹرز، ہوٹل انڈسٹری کے نمائندگان اور حکومتی افسران نے شرکت کی۔ ہوٹل انڈسٹری سے وابستہ نمائندگان نے کہا کہ ہوٹل انڈسٹری سیاحت کے فروغ میں اہم کردار ادا کر سکتی ہے۔
محکمہ سیاحت کے مطابق پاکستان میں بین الاقوامی سیاحوں سے زیادہ ملکی سیاح ہیں، ہمیں ان کو ٹارگٹ کرنا ہو گا اور انفراسٹرکچر بہتر بنانے کے ساتھ ساتھ سروسز کا معیار بہتر بنانا ہو گا۔
مزید خبروں اور اپڈیٹس کیلئے وزٹ کیجئے گرانہ بلاگ۔
