نادرا میں فیملی رجسٹریشن سرٹیفیکیٹ کے حصول کا طریقہ کار

2b

فیملی رجسٹریشن سرٹیفکیٹ آپ کے خاندان کے افراد کا نادرا میں ریکارڈ کا ایک اہم ذریعہ ہے۔ یہ سرٹیفیکیٹ دراصل آپ کے خاندان کے ارکان کو شناخت فراہم کرتا ہے۔ یاد رہے کہ فیملی رجسٹریشن سرٹیفکیٹ عمومی طور پر بیرونِ ملک سفر اور ویزہ کے حصول کے حوالے سے غیر ملکی سفارت خانوں کے ریکارڈ کا حصہ تو بن سکتا ہے لیکن یہ دستاویز قانونی یا لین دین کے معاملات میں استعمال نہیں کی جا سکتی۔

آج کی اس تحریر میں ہم اپنے قارئین کو چند مفید معلومات کی مدد سے آگاہ کرنا چاہیں گے کہ وہ فیملی رجسٹریشن سرٹیفیکیٹ کے حصول کے لیے اپنی درخواست کہاں اور کیسے جمع کروا سکتے ہیں۔

تو چلیے! شروع کرتے ہیں۔

ملکی قوانین کے مطابق آپ فیملی رجسٹریشن سرٹیفیکیٹ کے لیے ذیل میں درج تین زمروں میں اپنی درخواست جمع کروا سکتے ہیں:

پیدائش اور خاندان کے حوالے سے فیملی رجسٹریشن سرٹیفیکیٹ کا حصول

پیدائش اور خاندان کے حوالے سے دی گئی درخواست پر عملدرآمد کے بعد آپ کو جو سرٹیفیکیٹ موصول ہو گا اس میں آپ کے والدین اور بہن بھائیوں کی تفصیلات سمیت آپ کے خاندان کے دیگر افراد کی فہرست بھی درج ہو گی۔

ازدواجی فیملی کی بنیاد پر فیملی رجسٹریشن سرٹیفیکیٹ کا حصول

ازدواجی فیملی کی بنیاد پر دی گئی درخواست پر عملدرآمد کے بعد آپ کو جو سرٹیفیکیٹ موصول ہو گا اس میں آپ کی شریکِ حیات اور بچوں کی فہرست کا اندراج ہو گا۔

فیملی رجسٹریشن سرٹیفیکیٹ کی درخواست آپ کہاں جمع کروا سکتے ہیں؟

فیملی رجسٹریشن سرٹیفیکیٹ کے حصول کے لیے آپ کسی بھی قریبی نادرا رجسٹریشن سینٹر (این آر سی) سے رجوع کر سکتے ہیں یا پھر آن لائن ‘پاک آئی ڈی کی ویب سائٹ’ کے ذریعے بھی آپ اپنی درخواست جمع کروا سکتے ہیں۔

پیدائش اور خاندان کے حوالے سے ایف آر سی کے حصول میں این آر سی کے بنیادی لوازمات

آپ فیملی رجسٹریشن سرٹیفکیٹ کے حصول کے لیے مندرجہ ذیل عوامل پر عملدرآمد کرتے ہوئے کسی بھی قریبی نادرا رجسٹریشن سینٹر سے رجوع کر سکتے ہیں۔

نادرا رجسٹریشن سینٹر پہنچنے پر سب سے پہلے آپ کو الیکٹرانک مشین کے ذریعے ایک ٹوکن جاری کیا جائے گا۔

نابالغ بچوں کی وہیں آفس میں ڈیجیٹل تصاویر لی جائیں گی۔

تصویر کے بعد وہاں موجود نادرا کا آفیسر آپ کی فراہم کردہ تمام معلومات کے تفصیلی جائزے کے بعد خود ہی اِن معلومات کا کمپیوٹر سسٹم میں اندراج کرے گا۔

فراہم کردہ تمام معلومات کے تفصیلی جائزے اور اندراج کے بعد نادرا آفیسر آپ کے فیمیلی رجسٹریشن سرٹیفیکیٹ کا پرنٹ آپ کو فراہم کر دے گا بلکہ اگر آپ انہیں درخواست کریں تو آفیسر اس سرٹیفیکیٹ کی ایک نقل آپ کو ای میل پر بھی ارسال کر دے گا۔

ازدواجی فیملی کی بنیاد پر ایف آر سی کا حصول

یاد رکھیں! ازدواجی فیملی کی بنیاد پر ایف آر سی کے حصول کے لیے 18 سال سے کم عمر کے ان تمام بچوں کو آپ اپنے ہمراہ لازمی لے کر جائیں جن کا ریکارڈ آپ ایف آر سی سرٹیفیکیٹ میں درج کروانا چاہتے ہیں۔

اس کیٹیگری میں بھی ایف آر سی کا حصول ایک منظم اور آسان طریقہ کار پر مبنی ہے۔

آپ فیملی رجسٹریشن سرٹیفکیٹ کے حصول کے لیے مندرجہ ذیل عوامل پر عملدرآمد کرتے ہوئے کسی بھی قریبی نادرا رجسٹریشن سینٹر سے رجوع کر سکتے ہیں۔

نادرا رجسٹریشن سینٹر پہنچنے پر سب سے پہلے آپ کو الیکٹرانک مشین کے ذریعے ایک ٹوکن جاری کیا جائے گا۔

اٹھارہ سال اور اس سے کم عمر کے تمام بچوں کی ڈیجیٹل تصاویر وہیں نادرا سینٹر میں لی جائیں گی۔

تصویر کے بعد وہاں سیٹ پر موجود نادرا کا آفیسر خود آپ کی فراہم کردہ تمام مطلوبہ تفصیلات کا مکمل جائزہ لینے کے بعد ان معلومات کا کمپیوٹر سسٹم میں اندراج کرے گا۔

فراہم کردہ تمام معلومات کے تفصیلی جائزے اور اندراج کے بعد نادرا آفیسر آپ کے فیملی رجسٹریشن سرٹیفیکیٹ کا پرنٹ آپ کو فراہم کر دے گا۔

لے پالک یا گود لیے بچوں کی بنیاد پر ایف آر سی کے حصول کی درخواست دینے کا طریقہ کار

لے پالک یا گود لیے بچوں کی بنیاد پر ایف آر سی کے حصول کے لیے آپ کو تمام بچوں کو اپنے ہمراہ لانا ہو گا۔

نادرا رجسٹریشن سینٹر پہنچے پر آپ کو الیکٹرانک مشین کے ذریعے ٹوکن جاری کیا جائے گا۔

خاندان کے نابالغ افراد کی ڈیجیٹل تصاویر کی فراہمی ناگزیر ہے۔ اس حوالے سے گود لیے گئے ایسے بچے جن کی عمریں 21 سال سے کم ہیں ان کی بھی ڈیجیٹل تصاویر لی جائیں گی۔

تصویر کے بعد وہاں سینٹر پر موجود نادرا کا آفیسر آپ کی فراہم کردہ تمام مطلوبہ تفصیلات کا مکمل جائزہ لینے کے بعد ان معلومات کا کمپیوٹر سسٹم میں اندراج کرے گا۔

آپ کی مطلوبہ ایف آر سی سرٹیفیکیٹ کا پرنٹ آپ کے حوالے کر دیا جائے گا۔

پاک آئیڈینٹیٹی کی ویب سائٹ کے ذریعے ایف آر سی کے لیے درخواست دینے کا طریقہ کار

آپ اپنے فیملی رجسٹریشن سرٹیفکیٹ کے لیے پاک آئیڈینٹیٹی کی ویب سائٹ پر جا کر بھی درخواست دے سکتے ہیں۔

فیملی رجسٹریشن سرٹیفکیٹ صرف اُن درخواست دہندگان کو جاری کیا جاتا ہے جو نیشنل ڈیٹا بیس اینڈ رجسٹریشن اتھارٹی (نادرا) کے ساتھ رجسٹرڈ ہیں۔

اگر کوئی شخص نادرا میں رجسٹرڈ نہیں ہے اور اس کے پاس 13 ہندسوں کا شناختی نمبر نہیں ہے تو اس کا ڈیٹا ایف آر سی میں ظاہر نہیں ہوگا۔

میں اپنی فیملی رجسٹریشن کیسے چیک کروں؟

یہ بہت ہی آسان ہے۔ آپ صرف اپنا قومی شناختی کارڈ نمبر موبائل فون کے ذریعے 8008 پر بھیج دیں۔ علاوہ ازیں آپ کو تمام رجسٹرڈ فیملی ممبرز کی تفصیلات بھی یہاں مل جائیں گی۔

مزید خبروں اور اپڈیٹس کیلئے وزٹ کیجئے گرانہ بلاگ۔