اپارٹمنٹ کرائے پر لینے سے قبل بنیادی معائنہ کیوں ضروری؟

blog-image

کسی بھی چھوٹے یا بڑے شہر میں کرائے پر اپارٹمنٹ لینا اگرچہ جوئے شیر لانے کے برابر نہیں سمجھا جاتا۔ اور زیادہ تر دو سے تین دوروں میں فائنل مراحل طے کر کے منتقلی کا آغاز کر دیا جاتا ہے۔ تاہم، شفٹنگ کے بعد کم یا پھر بڑے پیمانے پر مختلف نوعیت کے مسائل کا سامنا کرنے پر افسوس ہوتا ہے۔ مزید یہ کہ پھر سے فوری طور پر کوئی اپارٹمنٹ دیکھنا اور شفٹ ہونا یقیناً آسان نہیں ہوتا۔ لہٰذا، بعد میں در پیش مسائل اور مشکلات سے بہتر ہے کہ جو اپارٹمنٹ بظاہر آپ کا صحیح انتخاب ہے اس میں منتقلی سے قبل ایک جائزہ لیا جائے۔ دیکھتے ہیں کہ کوئی بھی اپارٹمنٹ کرائے پر لینے سے قبل بنیادی معائنہ کیوں ضروری ہے۔

 

ایک عمارت کے باہر کرائے پر دستیاب اپارٹمنٹ کا بورڈ

 

اپارٹمنٹ کرائے پر لینے سے قبل موبائل فون اور وائی فائی سگنل کی فراہمی

سوشل میڈیا اور موبائل فون کے دور میں سگنلز سے دوری بلاشبہ ناقابلِ برداشت ہے۔ ذاتی ضروریات کے ساتھ ساتھ پیشہ ورانہ مصروفیات اور دفتر سے رابطے میں خلل بالکل قابلِ قبول نہیں۔ نئے علاقے کے نئے اپارٹمنٹ میں شفٹ ہونے پر ہمیں معلوم نہیں ہوتا کہ وہاں موبائل فون اور وائی فائی سگنلز کی مکمل فراہمی دستیاب ہے یا نہیں۔ کچھ علاقوں میں بظاہر سگنلز دستیاب ہوتے ہیں۔ لیکن تمام تر کمپنیوں کے سگنلز کام نہیں کرتے۔ علاوہ ازیں، وائی فائی کے معاملے میں بھی ایسا ہی ہے۔ لہٰذا، وزٹ کے دوران نہ صرف موبائل اور وائی فائی سگنلز چیک کریں بلکہ ان کا استعمال کر کے بلا تعطل فراہمی یقینی بنائیں۔

 

اپارٹمنٹ کرائے پر لینے سے قبل موبائل سگنل اور وائی فائی چیک کرتا ایک شخص

 

اپارٹمنٹ کرائے پر لینے سے قبل پانی کی باقاعدہ دستیابی یقینی بنائیں

پانی کسی بھی سیزن میں زیرِ استعمال آنی والی ضروری چیزوں میں سے ایک ہے۔ جس کے بغیر کسی طور گزارا ممکن نہیں۔ نئے اپارٹمنٹ میں منتقلی کے بعد اگر آپ کو پانی کی مکمل اور باقاعدہ فراہمی دستیاب نہ ہو تو یہ بڑے مسائل میں سے ایک ہے۔ کیونکہ کھانا بنانے سے لے کر، صفائی اور کپڑوں کی دھلائی تک پانی کے بغیر ممکن نہیں۔ دوسرے الفاظ میں چوبیس گھنٹے پانی کی فراہمی ضروری ہے۔ علاوہ ازیں، مکمل فلو اور پریشر کے ساتھ فراہمی ہو تو استعمال میں آسانی ہے۔ کیونکہ کم پریشر کے ساتھ کپڑوں کی دھلائی اور شاور میں کم پانی ناقابلِ استعمال ہوتا ہے۔ لہٰذا باقاعدہ پانی کی دستیابی یقینی بنائیں۔

 

کچن کے سنک میں ٹونٹی سے بہتا پانی

 

کرائے پر اپارٹمنٹ حشرات الارض سے پاک ہو

اپارٹمنٹ کرائے پر لینے سے قبل آپ دو سے تین، یا کم از کم تین سے چار دورے کرتے ہیں۔ جس میں زیادہ تر لوگوں کی ترجیح تمام حصوں کی سیٹنگ اور آئٹمز کی تنصیب ہوتی ہے۔ اور خالی اپارٹمنٹ یا روزانہ صفائی نہ ہونے کی بناء پر گھر کی موجودہ حالت پر غور نہیں کیا جاتا۔ تاہم شفٹنگ سے قبل صفائی کی جاتی ہے اور سامان پہنچایا جاتا ہے۔ لیکن اس مرحلے میں آپ یہ نہیں جان پاتے کہ آیا یہ اپارٹمنٹ کیڑے مکوڑوں اور حشرات الارض کی آماجگاہ ہے۔ اور شفٹنگ کے بعد صفائی کرنے کے باوجود ہر کونے کھدرے سے چوہوں، کیڑوں مکوڑوں اور دیگر حشرات الارض کی آمدو رفت جاری رہتی ہے۔ لہذا، یہ یقینی بنائیں کہ وہ اپارٹمنٹ پرانا تعمیر شدہ یا زیادہ عرصہ خالی رہنے کی وجہ سے کیڑوں مکوڑوں کا گھر نہ ہو۔

 

سر پہ کرسی اٹھائے فرش پر رینگتے کیڑے مکوڑوں سے پریشان ایک شخص

 

اپارٹمنٹ کرائے پر لینے سے قبل رات کے اوقات میں وزٹ ضرور کریں

اکثر و بیشتر کرائے پر اپارٹمنٹ لینے والے افراد دن کے کسی ایک حصے میں وزٹ کرتے ہیں۔ اس کی وجہ مصروفیت اور دیگر وجوہات بھی ہو سکتی ہیں۔ اگر آپ دن کے وقت دورہ کرتے ہیں تو اپارٹمنٹ کے اندر قدرتی روشنی کا حصول چیک کریں۔ جس کے بے شمار فوائد ہیں جیسا کہ دن میں زیادہ برقی لائٹس آن کرنے کی ضرورت پیش نہیں آئے گی۔ مزید براں، سورج کی روشنی اندر آنے سے دیواروں اور بیشتر حصوں میں نمی نہیں آنے پاتی اور سیم کے مسائل پیدا نہیں ہوتے۔ علاوہ ازیں، رات کے وقت ضرور دورہ کریں تاکہ ارد گرد کے ماحول، وہاں مقیم لوگوں کے رجحانات اور اپارٹمنٹ کے آس پاس روشنی یا اندھیرے جیسے ماحول کا اندازہ لگایا جا سکے۔

 

اپارٹمنٹ کا کھلا دروازہ اور کاریڈور میں اندھیرا

 

اپارٹمنٹ کرائے پر لینے سے قبل مختلف اوقات میں پارکنگ کی دستیابی

اپارٹمنٹ کرائے پر لے لیا۔ شفٹ ہو گئے۔ گھر کی سیٹنگ کر لی گئی۔ تمام آئٹمز کی تنصیب ہو گئی۔ اب آپ نے چوبیس گھنٹے اسی اپارٹمنٹ میں آنا جانا اور رہنا ہے۔ لیکن روزانہ آنے جانے پر آپ کو اندازہ ہوا کہ پارکنگ سے متعلق بڑے سنجیدہ مسائل در پیش ہیں۔ مثال کے طور پر، اپارٹمنٹ میں شفٹ ہونے سے قبل جس وقت آپ آتے تھے، پارکنگ دستیاب ہوتی تھی۔ لیکن رات کے اوقات میں بلڈنگ میں مقیم تقریباً تمام افراد کو پارکنگ کی ضرورت ہے۔ اور سب کی گاڑیوں کی موجودگی کے باعث آپ اس وقت گاڑی کے لیے پارکنگ نہیں لے پا رہے۔ لہٰذا، یہ سب سہولیات منحصر ہیں اپارٹمنٹ کرائے پر لینے سے قبل ایک جائزے پر۔ ہمیشہ پارکنگ کی سہولت یقینی بنائیں۔

 

اپارٹمنٹ بلڈنگ کے باہر موجود پارکنگ میں گاڑیاں

 

اپارٹمنٹ کرائے پر لینے سے قبل پڑوسیوں سے بات چیت

یہ بات بالکل واضح ہے کہ آپ کہیں بھی شفٹ ہوں۔ یقیناً اپنے سٹینڈرڈ کے لوگوں میں رہنا پسند کریں گے۔ اور اپنے لیونگ سٹائل کا لیول ڈاؤن نہیں کریں گے۔ لہٰذا، کوشش کریں کہ ارد گرد کے لوگوں، خاص طور پر ہمساؤں سے ملاقات اور بات چیت کی کوشش کریں۔ تاکہ آپ جائزہ لے سکیں کہ بعد ازاں یہاں مقیم لوگوں سے میل جول اور ماحول آپ کے طرزِ رہائش کے مطابق ہے یا نہیں۔

مزید خبروں اور اپڈیٹس کیلئے وزٹ کیجئے گرانہ بلاگ۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے